Hoku 'Eiki,
'Oku fiefia mo'oni hoku loto ke fai ha fakafeangai moe 'afiona he 'oku ke lelei mo 'alo'ofa ki he angahala mo e angatonu. 'E Sihova, 'oku ou kole fakamolemole atu kiate ko e 'i he 'eku ngaahi talangata'a kiate ko e mo e ngaahi 'ulungaanga ta'etaau kiate koe. 'Oku fiefia hoku loto he 'oku ke kei 'alo'ofa mai pe kiate au neongo 'eku ta'e taau. Fakafeta'i 'Eiki ho'o 'ofa mai pea 'ofa pe 'e kei tolonga ma'u pe ho ngaahi 'alo'ofa 'o a'u ki he ngata'anga 'o e mo'ui ni.
Ko e kamata 'eni 'eku blog ko e taumu'a ko ha talatalanoa mo e 'Eiki ki he anga 'eku mo'ui. 'Oku fakafeta'i hoku laumalie 'i he 'ofa lahi kuo 'inasi ai 'eku mo'ui 'i he tokoni mo e kau mai 'a e 'afio na. 'Oku te lau ma'u pe 'a e ngaahi tapuaki kuo ke vahea mo'oku pea mo hoku famili. 'Oku fakalata mo'oni mo e nonga 'a e feohi mo e ko e 'Eiki. 'Oku ke faitotonu mo 'alo'ofa foki kiate au. Ko hoku loto 'e Tamai ko e loto ta'etaau mo'oni, 'oku 'ikai puli ha me'a mei ho fofonga - 'oku 'iai 'a e loto kovi, fakavahavaha'a, loto taaufehi'a, mahalo kovi, manumanu, fie'otua, fakapikopiko, loi, faka-e-kakano mo e ngaahi 'ulungaanga kovi 'oku ha atu mei ate au. 'Oku ou kole atu 'e Tamai keke fakamolemole'i ange au pea 'oku ou fokotu'u ko e 'e Sisu keke 'afio he taloni 'o 'eku mo'ui. Keke kapiteni koe, keke taumu'a ko e peau fakaongoongo atu kiate ko e 'i he taimi ni 'o a'u ki he ngata'anga 'o 'eku mo'ui.
Fakamalo atu 'e Tamai he 'oku 'ikai ha'o tatau pea 'oku 'a'au 'a e lelei kotoa 'o e maama ko'eni. 'Alo'ofa mai pe 'e tamai ki he laumalie ni pea keu kei fai pe ho finangalo. Kole mo vahevahe atu 'a e 'u me'a ni 'ia Sisu Kalaisi. 'Emeni.
